Domols vor Corona Zeit

Die Buchwalsteggegeja

vom Willy

Seid 16 Johr geht dat schon so, jere Feidachmeddach senn se do,

an däm frijare Buchwalshaus, holle die ihr Stegge raus.

Begrieße sich met vill Halloo, wer noch kemmt on wer schon doo.

Se komme all aus selwem Grond, se glawe fescht et es gesond,

denke nie dran mol offsehere, met de Stegge se träneere.

Ohne Träning do geht ach nix, do senn die Stegge nur e Witz,

die gebs aus villem Matrial, sogar aus Carbon on aus Stahl.

Wie ma‘s rischdisch mache soll, dat es net schwer et es doll.

Been rechts vor on Arm zereck, mem Stegge werd fescht nogedreggt,

Arm on Been em Rydmus schwingt, datselwe links et fertisch brengt.

Dursch Hewelkraft dat es klaa, die werd off Stegge iwwadraa,

de Drugg no vore der dreggt dann, zu emma schnellere Schridde aan.

Dad hat jera gudd verstann, lo gugge ma wie‘s jera kann,

ab geht‘s endlich en de Wald, egal wies es, ob‘s warm ob‘s kalt.

Dad erschde Stegg gehts nur berschoff, do here die Gepräche off,

werd die Stregg dann ebbes flach, genn die Gespäche wirra wach.

Allegar senn endressiert, wie sich jetzt Wolferschwella präsendiert,

gespannt senn all wer doo gewonn, es et de Newel orra die Sonn?

De Bleck off Wolferschwella on Natur, es dat scheenschde an da Tour.

Die Mosberschhidd die nägscht Etapp, do gehts eroff on net ze knapp.

Gymnastig solls do emma genn, doch manschmol wolle se nur Hemm.

Dann gehts ab no onne, on dat kena fällt, senn die Stegge no fore gestellt.

Die uralte Lersche noch emma do stehn, senn rießisch on bewonnertswert scheen.

Unne aankomm on dann schonn, steggele se bei da Douglasie eromm,

die es gewaldisch gross on stramm, et werd gesaad mem diggschde Stamm.

Zum Buchwaldshaus der letschd Etapp, senn all noch fitt on keena schlapp,

dat es, watt all so guddd gefällt, on die Grupp zesamme hält.

Jo, dat gefällt so Allegare kena brauch weit fortsefahre,

de Buchwald reischt do voll aus, Start es emma am Buchwaldhaus.